Skuldatryggingaálag Íslands með því lægsta frá hruni

Skuldatryggingaálagið á ríkissjóð Íslands hefur hríðlækkað að undanförnu og er komið niður í 217 punkta. Hefur álagið ekki verið lægra í rúmt ár eða síðan í apríl í fyrra þegar það fór í 216 punkta. Þá var um að ræða lægst álagið frá hruninu haustið 2008.

Álagið fór hæst í 312 punkta í júní í sumar en hefur lækkað stöðugt undanfarinn mánuð.

Lækkun á skuldatryggingaálagi Íslands er í takt við þróunina hjá öðrum Evrópuþjóðum að undanförnu.

Þetta álag hjá þeim lækkaði almennt eftir að Mario Draghi bankastjóri Seðlabanka Evrópu greindi nýlega frá áætlunum bankans um ótakmörkuð kaup á skammtímaskuldabréfum evruríkja.