Marel sendir nýliðana í fiskvinnslur

Nýliðar hjá fiskiðnaðarsetri Marels eru látnir vinna eina til tvær vikur í fiskvinnslum svo þeir geti komist í snertingu við framleiðsluvörur sínar og áttað sig betur á því hvernig er að vinna í fiskiðnaði.

Fiskiðnaðarsetur Marels fæst við vöruþróun í fiskiðnaði svo heimsóknir í fiskvinnslur hjálpa starfsfólkinu vel að skilja hvað það er að fást við. „Við erum nýbúin að senda nokkra nýliða. Það er markmiðið að allir fái að kynnast fiskiðnaðinum," segir Ólöf Sigurgeirsdóttir, rekstrarstjóri fiskiðnaðarseturs Marels.

Á fiskiðnaðarsetri Marels er leitast við að ráða starfsfólk sem hefur reynslu af fiskvinnslu. Það tekst hins vegar ekki alltaf og þá eru nýliðarnir sendir í stuttar tarnir í fiskvinnslu svo þeir fái smjörþef af fiskiðnaðinum.

„Þetta er oft nýútskrifað fólk úr verkfræði svo að heimsóknir í fiskvinnslurnar tengja það við viðfangsefnið," segir Ólöf.

Gunnar Atli Thoroddsen, verkfræðingur og starfsmaður fiskiðnaðarsetursins, eyddi einni viku við færibandið í fiskvinnslu. Hann segir að vinnan hafi tekið á. „Þetta var erfiðisvinna," segir hann.

En þrátt fyrir bakverki er hann sannfærður um að heimsóknin hafi haft góð áhrif og hjálpað honum að skilja fiskiðnaðinn. „Það var nauðsynlegt að komast inn í þetta hugarfar og skilja hvað er í gangi," segir hann.