Ríkiskaup semja við Nýherja um prentlausnir

Ríkiskaup hafa gert rammasamning við Nýherja sem felur í sér kaup á prentlausnum, prenturum og rekstrarvöru fyrir ríkisfyrirtæki og sveitarfélög, sem eru aðilar að rammasamningnum.

Samningurinn gerir aðilum meðal annars kleift að semja um Rent A Prent prentþjónustu, sem er græn prentþjónusta sem felur í sér allt að því 25-30% lækkun á árlegum prentkostnaði fyrirtækja. Notendur Rent A Prent þjónustu Nýherja eru nú um 15 þúsund talsins.

Ennfremur felur samningurinn í sér sérkjör á blek- og dufthylkjum til handa ríkisfyrirtækjum og sveitarfélögum.

„Það er ánægjulegt að Ríkiskaup hafi enn á ný valið Nýherja enda leggjum við okkur alla fram um gott samstarf, gæði og hagstætt verð til handa ríkisfyrirtækjum, sveitarfélögum sem og öðrum," segir Emil Einarsson framkvæmdastjóri Fyrirtækjasviðs Nýherja.

Fyrsti rammasamningur um upplýsingatækni var gerður árið 2000 og hefur Nýherji verið með frá upphafi.