Friðrik Már: Helstu áhyggjurnar hjá ríkissjóði snúa að útgjöldum

Gert er ráð fyrir því í áætlunum stjórnvalda að heildartekjur ríkissjóðs muni vaxa um ríflega 100 milljarða króna á fjórum árum. Á sama tíma eiga útgjöld að vaxa um ríflega 50 milljarða. Friðrik Már Baldursson prófessor, segir að vel þurfi að halda spöðunum í rekstri ríkisins á næstu árum, þar sem aðstæður gætu orðið erfiðar.

Samkvæmt áætlun stjórnvalda um afkomu ríkissjóðs er ráð fyrir því gert að tekjur ríkissjóðs muni halda áfram að aukast, samhliða hagvaxtarskeiði, á sama tíma og útgjöld muni vaxa mun minna.

Gert er ráð fyrir að heildartekjur ríkisins muni vaxa úr ríflega 570 milljörðum króna árið 2013 í ríflega 670 milljarða á árinu 2016. Útgjöldin munu á sama tíma vaxa úr 573 milljörðum í ríflega 625 milljarða. Samkvæmt þessari áætlun mun staða ríkissjóðs því batna um rílega 52 milljarða króna.

Friðrik Már Baldursson, prófessor við Háskólann í Reykjavík, segir að gert sé ráð fyrir að tekjuvöxturinn hangi saman við hóflegan hagvöxt, sem sé nokkuð raunhæft að hans mati.

„Helstu áhyggjurnar snúa að útgjöldunum, og hvort það tekst að halda þeim í skefjum, og eins og áætlanir gera ráð fyrir," segir Friðrik Már.

Friðrik segir ríkissjóður geti styrkt stöðu sína með sölu á eignum, til þess að greiða niður skuldir.

„Ríkið á umtalsverðar eignir sem það getur selt, og hraðað því að greiða niður skuldir," segir Friðrik Már.