Skuldatryggingaálag Íslands það lægsta frá því fyrir hrun

Skuldatryggingaálagið á ríkissjóð Íslands er nú komið niður í 210 punkta sem er það lægsta frá því fyrir hrunið haustið 2008.

Þetta kemur fram á vefsíðunni Keldan.is sem fær sína upplýsingar frá Bloomberg og CMA gagnaveitunni. Álag þetta fór áður lægst í 216 punkta í apríl í fyrra. Það fór hinsvegar hæst í ár í 312 punkta í júní s.l. og hefur því lækkað um rúma 100 punkta síðan þá.

Þessi lækkun á skuldatryggingaálagi Íslands er í samræmi við lækkanir hjá mörgum öðrum Evrópuþjóðum að undanförnu þar sem dregið hefur úr efnahagserfiðleikunum á evrusvæðinu.

Skuldatryggingaálag upp á 210 punkta þýðir að það þarf að greiða rúm 2% af nafnverði skuldabréfs til fimm ára til að tryggja það gegn greiðslufalli.