Borgin kaupir land við Mýrargötu fyrir hálfan milljarð

Stjórn Faxaflóahafna hefur samþykkt drög að samningi fyrirtækisins og Reykjavíkurborgar um að borgina kaupi alls 18.432 fm lands norðan Mýrargötu. Fyrir þetta land mun borgin greiða rúmlega hálfan milljarð kr.

Á vefsíðu Faxaflóahafna segir að þetta land hafi um nokkurra ára skeið verið hugsað sem íbúðasvæði og nú þegar drög að rammaskipulagi liggja fyrir þá er eðlilegt að verkefnið færist yfir til Reykjavíkurborgar þar sem megin hlutverk Faxaflóahafna lítur að rekstri hafna og hafnasvæða.

Það svæði sem Faxaflóahafnir sf.hafa þróað á svonefndu Mýrargötu og slippasvæði er alls um 38.200 fm. Þessi fyrsti áfangi svæðisins sem fer nú til deiliskipulagningar og framkvæmda er því um 40% heildar svæðisins. Eftir stendur sjálft slippasvæðið og lóð við Ægisgarð.

Skipta má hinu selda landi í þrennt: Land sem verður framtíðar byggingaland, lóð undir Mýrargötu 2-8 og svo gamli Steinbærinn við Lagargata 2. Söluverð þessa pakka er 514.345.000 kr. og miðað við stærð þess lands sem selt er er meðalverð á hvern fermetra 27.905 kr.

Við sölu landsins mun Reykjavíkurborg ganga frá nauðsynlegum breytingum á aðalskipulagi og hafnarmörkum, sem færast norðar í landinu. Í Vesturbugtinni verður sem sagt áfram hafnarsvæði og fyrirhugað á árinu 2013 að vinna það að umhverfisbótum og útlagningu á flotbryggju þannig að möguleiki verði á ferðaþjónustu þar.