Umtalsverður áhugi á hinu "alþjóðlega fágæti"

Fjölmörg boð hafa þegar borist í hina tæplega 370 ára bók Arngríms lærða sem er nú föl á vefnum uppboð.is. Uppboðið hófst í gær og stendur til 30. september.

Bókin sem um ræðir er Specimen Islandiæ historicum sem rituð var af Arngrími lærða um Ísland. Hún var prentuð og gefin út í Amsterdam árið 1643. Bókin er metin á 350 þúsund en mun fara á uppboðinu fyrir hæsta boð.

„Þetta er náttúrlega alþjóðlegt fágæti sem prentgripur," segir Eiríkur Ágúst Guðjónsson, umsjónarmaður netverslunarinnar bokin.is sem stendur að uppboðinu. Hann segir að talsverður áhugi sé fyrir bókinni og ekki sé útilokað að hún verði keypt til útlanda. „Við viljum auðvitað halda henni hér á landi," segir hann en útskýrir að þar sem hún telst ekki íslensk falli hún ekki undir þjóðminjalögin og því er mögulegt að erlendir aðilar kaupi hana. Uppboðið hafi hins vegar lítið sem ekkert verið auglýst erlendis.

Eiríkur útskýrir að aðstandendur uppboðsins geti aldrei vitað hverjir séu að bjóða. Hann gerir ráð fyrir að lokaspretturinn verði töluvert spennandi.