Íslenskt hugvit í Hvíta húsið

Íslenska fyrirtækið DataMarket mun kynna nýjan hugbúnað í Hvíta húsinu í byrjun næsta mánaðar. Hugbúnaðurinn er gerður til að safna saman öllum upplýsingum um orkumál í Bandaríkjunum á eina vefgátt. Þannig væri hægt að nálgast allar upplýsingar um orkumál í Bandaríkjunum á einum stað, en hugbúnaðurinn var forritaður að beiðni Hvíta hússins.

Auk DataMarket munu fleiri frumkvöðlar og nýsköpunarfyrirtæki viðra hugmyndir sínar á fyrirlestrinum sem fram fer 1. október næstkomandi. Allar lúta hugmyndirnar að orkumálum í Bandaríkjunum.

Ekki er víst að vefgátt DataMarket verði notuð af Hvíta húsinu þegar upp er staðið. Hins vegar er öruggt að DataMarket ætlar sér að gera viðskiptahugmynd úr vefgáttinni hvort sem Hvíta húsið kaupir hana eða ekki. Til dæmis mætti nota svipaða hugmynd til að safna saman öllum upplýsingum um ferðaiðnað á Íslandi og telja starfsmenn DataMarket að það gæti orðið ýmsum til hægðarauka.

Það hefur lengi verið á stefnuskrá Barack Obama, bandaríkjaforseta, að safna upplýsingum um orkumál á einn stað og var DataMarket boðið tækifæri til að finna lausn á því vandamáli.