Íbúðaleiga hækkar verulega í verði

Leiguverð hækkaði um 1,3% í ágúst mánuði samkvæmt mælingum Þjóðskrár Íslands sem birtir mánaðarlega vísitölu leiguverðs á höfuðborgarsvæðinu. Leiguverð hefur samkvæmt þessari mælingu hækkað mikið í sumar, eða um tæp 7% síðan í maí síðastliðnum. Þessi hækkun leiguverðs virðist hinsvegar aðeins eiga sér stað á höfuðborgarsvæðinu þar sem vísitala leiguverðs sem Hagstofan tekur saman og endurspeglar leiguverð á landinu öllu hefur aðeins hækkað um 0,8% á sama tímabili. Þessi mikla hækkun leiguverðs á höfuðborgarsvæðinu á þessum árstíma endurspeglar sókn námsmanna í íbúðir áður en skólarnir hefjast á haustin.

Greining Íslandsbanka segir margt benda til þess að skortur sé á leiguíbúðum á markaði sem hentar námsmönnum, og hafa til að mynda biðlistar eftir námsmannaíbúðum hjá Félagsstofnun stúdenta aldrei verið lengri en nú í haust. Undanfarna 12 mánuði hefur leiguverð hækkað um rétt tæp 11% á höfuðborgarsvæðinu samkvæmt tölum Þjóðskrár Íslands, en gögnin ná aftur til ársbyrjunar 2011. Greining segir þetta vera töluvert meiri hækkun leiguverðs heldur en mælingar Hagstofu um leiguverð bendi til, en samkvæmt mælingum Hagstofunnar hefur leiguverð nú hækkað um 5,1% undanfarna 12 mánuði.