Draghi ýjar að fjárinnspýtingu

Mario Draghi, bankastjóri Seðlabanka Evrópu, ýjaði að því á lokuðum fundi í Evrópuþinginu í dag að bankinn gæti þurft að koma þjóðríkjum í vanda til hjálpar með frekari kaupum á ríkisskuldabréfum. Frá þessu greindi Wall Street Journal á vef sínum í kvöld. Draghi var til svara á fundi í Evrópuþinginu, en mánaðarlegur peningastefnufundur Seðlabanka Evrópu fer fram á fimmtudaginn.

Draghi sagði að ef að kaupunum yrði, myndi bankinn kaupa skuldabréf til tveggja eða þriggja ára, þannig að kaupin séu innan reglna bankans, að því er segir í frétt Wall Street Journal.

Sérstaklega er horft til þess að bankinn komi hugsanlega þjóðum Suður-Evrópu til hjálpar, Grikklandi, Spáni, Portúgal og Ítalíu, með fjármögnun, þá einkum með það að markmiði að lækka vaxtaálag á skuldir þjóðanna.

Samkvæmt upplýsingum frá Bloomberg, sem aðgengilegar eru með snjallsímaforriti fyrirtækisins, er álag á skuldir þessara ríkja það hæsta á meðal Evrópuþjóða. Álag á 10 ára ríkisskuldabréf Grikklands er langsamlega hæst, 22,2 prósent, álga á tíu ára ríkisskuldabréf Ítalíu er 5,75 prósent og Spánar 6,79 prósent, svo dæmi séu nefnd.

Sjá má umfjöllun Wall Street Journal um þessi mál, hér.