Tímamótasamningur hjá Advania

Íslenska upplýsingatæknifyrirtækið Advania, áður Skýrr, hefur náð tímamótasamningi við sænsku tryggingarstofnunina um innleiðingu á nýju upplýsingakerfi. Samningurinn er metinn á tvo komma þrjá milljarða króna.

Advania sem er í grunninn upplýsingatæknifyrirtækið Skýrr er stöðugt að sækja í sig veðrið á Norðurlöndunum en markmiðið er að verða leiðandi á markaði með upplýsingatækni.

Fyrirtækið hefur nú náð samningi við Tryggingarstofnun Svíþjóðar um alhliða tölvu og símaþjónustu.

Það er Advania í Svíþjóð sem sér um að innleiða kerfið hjá sænsku tryggingarstofnuninni en kerfið verður nýtt af rúmlega 1.000 starfsmönnum þjónustuvers stofnunarinnar. Um er að ræða heildarlausn á öllum samskiptum þjónustuvers við skjólstæðinga stofnunarinnar, hvort heldur gegnum síma, tölvupóst eða netspjall. Kerfi Advania leysir af hólmi sænska símafyrirtæki Telia, an Advania vann samninginn að undangengnu útboði.

„Þarna erum við að tala um eitt kerfi sem samþættir hefðbundin símkerfi og upplýsingatækni þannig að það er allt tekið saman í eitt," segir Gestur G. Gestsson, forstjóri Advania.

Gestur segir að samningurinn sem er til þriggja ára og hljóðar upp á 2,3 milljarða króna sé afar mikilvægur fyrir Advania.

„Vissulega er þetta rosalega mikill áfangi fyrir okkur að ná svona stórum samningum og undirstrikar í raun það sem við höfum stefnt að, að gera Advania að einu öflugasta upplýsingatæknifyrirtæki Norðurlandanna, sem getur tekist á við verkefni af þessari stærð," segir Gestur.