Íbúðum í eigu ÍLS fjölgaði um 1.700 á þremur árum

Íbúðum í eigu Íbúðalánasjóðs (ÍLS) heldur áfram að fjölga og í júnílok átti sjóðurinn samtals 2.049 fasteignir og hefur þeim fjölgað um 443 síðan í upphafi ársins. Fasteignum í eigu sjóðsins hefur fjölgað verulega undanfarin misseri í byrjun árs 2010 átti sjóðurinn 347 íbúðir og hefur þeim því fjölgað um 1.709 á innan við þremur árum.

Fjallað er um málið í Morgunkorni greiningar Íslandsbanka. Þar segir að þessi mikla aukning er tilkomin vegna greiðsluerfiðleika lántakenda hjá sjóðnum en á fyrri helmingi ársins leysti sjóðurinn til sín 501 fasteign og seldi 58 fasteignir.

Fasteignir í útleigu í lok júní voru 846 eða sem nemur 41% af heildarfjölda fasteigna sjóðsins og námu leigutekjur af fasteignunum samtals 449,6 milljónum kr. á fyrri árshelmingi.

Árið 2010 leysti Íbúðalánasjóður til sín 854 fasteignir til fullnustu krafna og á síðasta ári voru 691 fasteignir innleystar. Íbúðalánasjóður á því um það bil 1,6% af öllum íbúðum í landinu. Ljóst er að svo mikið framboð fasteigna gæti haft áhrif á íbúðaverð til lækkunar ef það yrði losað inn á markaðinn á stuttum tíma. Það er hinsvegar ólíklegt að það gerist en Íbúðalánasjóður hefur farið sér mjög hægt í þessum efnum.

Á síðasta ári seldi sjóðurinn 154 íbúðir og á árinu 2010 voru 132 íbúðir seldar. Það sem af er þessu ári hefur sjóðurinn selt 58 íbúðir.