Pétur ráðinn framkvæmdastjóri Fíton

Pétur Pétursson hefur verið ráðinn framkvæmdastjóri auglýsingastofunnar Fíton. Pétur ber ábyrgð á daglegum rekstri auglýsingastofunnar, ásamt stefnumótun og framkvæmd hennar, eins og fram kemur í fréttatilkynningu. Hann situr í framkvæmdaráði Kaaberhússins, en innan þess starfa auk Fítons 4 sérhæfð fyrirtæki í markaðsmálum og boðmiðlun.

Pétur hefur víðtæka reynslu úr atvinnulífinu og úr auglýsingageiranum en hann hefur frá árinu 2007 verið framkvæmdastjóri tekjusviðs/sölu- og þjónustusviðs 365 miðla. Þar áður var hann framkvæmdastjóri vátrygginga- og fjármálaþjónustu Tryggingamiðstöðvarinnar 2005 til 2007. Hann starfaði sem forstöðumaður upplýsinga- og kynningarmála hjá Íslandssíma og síðar Vodafone árin 1999 til 2005 og á auglýsingastofunni GSP almannatengslum þar á undan og sem frétta- og blaðamaður um 10 ára skeið. Pétur er með BA próf í stjórnmálasögu, auk þess að hafa sótt námskeið hérlendis og erlendis í stefnumótun og verkefnastjórnun.

Fíton er ein af elstu og rótgrónustu auglýsingastofum landsins.

Smelltu hér að neðan til að sjá fréttatilkynningu Fíton.