Afstaða Noregs stendur í vegi fyrir árangri

Ein helsta ástæða þess að makrílfundurinn í London í gær skilaði engum árangri var einstrengingsleg afstaða Noregs. Þetta kemur fram á heimasíðu atvinnuvegaráðuneytisins, en Norðmenn eru sagðir kenna Íslendingum og Færeyingum um hve illa gengur að leysa deiluna þó raunin sé sú að Íslendingar hafi sýnt mikinn sveigjanleika.

Steingrímur J. Sigfússon er atvinnuvegaráðherra og hann telur ástæðu til að skýra sjónarmið Íslands í makríldeilunni. Það er gert á heimasíðu atvinnuvegaráðuneytisins.

Þar kemur fram að ekki sé við Ísland að sakast þó illa gangi að leysa deiluna. Íslendingar geti sætt sig við lægra hlutfall af heildarveiði en nú gefið að Íslendingar fái aðgang að lögsögum annarra ríkja. Þannig væri hægt að minnka heildarveiðina.

Þó endanlegt samkomulag náist ekki leggja Íslendingar til að öll ríkin minnki veiði sína um tiltekinn hluta og geta jafnvel sætt sig við að taka þátt í slíkum aðgerðum þó einhver ríki geri það ekki, svo lengi sem stærstu ríkin taki þátt. Í því skyni lögðu Íslendingar til að veiðin yrði minnkuð um 20% á næsta ári.

Þessar hugmyndir Íslendinga virðast ekki hafa fengið hljómgrunn og enn skellir sjávarútvegsráðherra Noregs allri skuldinni á Íslendinga.