Áhöld um hvort hægt sé að refsa fyrir gjaldeyrisbrask

Ríkissaksóknari og Seðlabankinn eru á algjörlega öndverðum meiði um hvort hægt sé að ákæra þá sem grunaðir eru um gjaldeyrisbrask. Ríkissaksóknari telur refsiheimildir ófullnægjandi en Seðlabankinn alveg skýrt að heimildir séu fyrir hendi.

Lögum um gjaldeyrisviðskipti er ætlað að koma í veg fyrir að hægt sé að komast fram hjá gjaldeyrishöftum.

Við greindum frá því í byrjun ágúst að í álitsgerð Ríkissaksóknara frá því í lok mars kemur fram að refsiheimildir í lögum um gjaldeyrisviðskipti eru taldar ófullnægjandi.

Þessu var Seðlabankinn ósammála og krafðist fundar með Ríkissaksóknara vegna málsins. Slíkur fundur hefur enn ekki verið haldinn og mun ekki verða haldinn þar sem Ríkissaksóknari taldi að Seðlabankinn vildi hafa áhrif á ákæruvaldið - Slíkt væri ekki í boði.

Í svari Seðlabankans frá því í gær við fyrirspurn fréttastofu um málið kemur fram að bankinn telur ekki að refsiheimildir skorti við brotum á lögum um gjaldeyrismál. Seðlabankinn tjáir sig hins vegar ekki um niðurstöður ákæruvalds í einstökum málum.

Seðlabankinn er því ósamála Ríkissaksóknara að þessu leyti og telur refsiheimildir fyrir hendi en Ríkissaksóknari telur þær ekki fullnægjandi og þar við situr.

Samkvæmt þessari niðurstöðu geta menn því hafa gerst brotlegir við lögin en þar sem Ríkissaksóknari telur ekki nægilega heimild til að refsa þeim fyrir brotið og því ekki hægt að ákæra fyrir þar gætu því rannsóknir Seðlabankans verið unnar gýg.