Ísland enn í 30. sæti hvað samkeppnishæfni varðar

Ísland vermir enn 30. sætið í mælingum Alþjóðaefnahagsráðsins á samkeppnishæfni þjóða. Þrátt fyrir að litlar breytingar eigi sér nú stað á milli ára, þá er þessi staða mikill viðsnúningur frá því sem var fyrir tveimur árum síðan þegar Ísland féll um sex sæti.

Þetta kemur fram í tilkynningu um málið frá Nýsköpunarmiðstöð Íslands. Þar segir að í umsögn Alþjóðefnahagsráðsins um stöðu Íslands segir að þrátt fyrir erfiðleika á ýmsum sviðum hin síðustu ár þá haldi landið áfram að hagnast af nokkrum mikilvægum samkeppnisþáttum sem hjálpi landinu að færast nær aukinni sjálfbærni og velgengni í efnahagslífinu.

Hér er um að ræða þætti eins og stöðu heilbrigðismála og menntunar á öllum stigum og viðskiptalíf sem drifið er áfram af nýsköpun og áherslu á nýja tækni sem eykur framleiðni á mörgum sviðum.

Það hversu sveigjanlegur vinnumarkaðurinn á Íslandi er hefur einnig mikil áhrif á virkni markaðarins.

Þrálátur veikleiki efnahagsumhverfisins og veikur fjármálamarkaður heldur hins vegar áfram að draga úr samkeppnishæfni Íslands og veldur því að landið stendur í stað á milli ára.