Tollar og vörugjöld fela í sér mismunun

Innflutningstollar á vörur fela í sér hrópandi mismunun milli þeirra sem eru efnaðir og þeirra sem hafa lítið milli handanna. Þetta fullyrti Guðlaugur Þór Þórðarson, þingmaður Sjálfstæðisflokksins, í útvarpsþættinum Reykjavík Síðdegis í dag.

Flugfarþegar sem ferðast til annarra landa geta verslað ódýran varning þar og flutt hann til landsins án þess að borga af honum tolla upp að ákveðnu marki. Þeir sem heima sitja þurfa hins vegar að greiða tolla og vörugjöld af öllu sem þeir flytja til landsins.

„Þetta er náttúrlega ótrúlega mikil mismunun og skrítið hvað þetta er lítið í umræðunni," sagði Guðlaugur, enda telur hann blasa við að það sé aðeins efnameira fólk sem hefur tök á því að ferðast til annarra landa og fær þannig möguleika á að versla ódýrari varning.

„Sérstaklega er þetta óréttlátt gagnvart þeim sem eru efnaminnstir á landinu," segir hann. „ En þetta er ekki bara óréttlátt, þetta er líka óskynsamlegt," enda telur hann að með háum tollum sé verið að hrekja alla verslun úr landinu enda sæki landsmenn frekar til annarra landa til að versla.

„Það er löngu kominn tími til að við endurskoðum alla viðskiptastefnu okkar með það að markmiði að lækka gjöld og bæta lífskjör fólks, sérstaklega þeirra sem minnst mega sín," segir hann og telur einstakt tækifæri til þess nú þegar Ísland er ekki hluti af Evrópusambandinu.

Aðspurður telur hann ekki rétt að ríkið missi af tekjum ef það lækki tolla. Það eina sem tollarnir geri sé að fæla verslun burt úr landinu.

Viðtalið við Guðlaug í heild sinni má nálgast á hlekknum hér að ofan.