Landsliðsþjálfarinn mætir á haustráðstefnu Advania

Von er á liðlega 900 gestum á haustráðstefnu Advania sem verður haldin á Hilton-hótelinu í Reykjavík á morgun. Um er að ræða stærsta stefnumót upplýsingatækni og atvinnulífs ár hvert. Að þessu sinni verða um 40 fyrirlestrar í boði á 4 mismunandi þemalínum sparnaðar, hagnýtingar, fróðleiks og virkni. Liðlega helmingur fyrirlesara kemur erlendis, meðal annars Dan Lyons, tækniritstjóri Newsweek, og Lars Lagerbäck, þjálfari íslenska karlalandsliðsins í knattspyrnu. Hátt í eitt þúsund ráðstefnugestir eru væntanlegir.

Þess má geta að Advania fór sumpartinn sérstakar leiðir við kynningu á ráðstefnunni og setti meðal annars saman vídeó, þar sem ýmsir þekktir Íslendingar segja frá því hvernig líf þeirra hefur verið snortið af ráðstefnunni gegnum árin.

Lykilræður ráðstefnunnar verða þrjár. Dan Lyons, tækniritstjóri Newsweek, fjallar um byltingu snjallsíma og samfélagsmiðla og áhrif hennar á atvinnulífið. Björn Zoëga, forstjóri Landspítala-Háskólasjúkrahúss, segir frá nýja spítalanum í Vatnsmýrinni; þessu tækniundri sem verður hjarta þekkingariðnaðar í landinu. Janne Sigurðsson, forstjóri Fjarðaáls, greinir frá því hvernig álverið á Reyðarfirði beitir upplýsingatækni á markvissan hátt til að skapa þekkingarver í fremstu röð.

Þennan sama dag klukkan 18:45 verður landsleikur Íslands og Noregs í knattspyrnu. Af því tilefni hefur Advania ákveðið að bjóða öllum ráðstefnugestum á landsleikinn. Í tengslum við þá uppákomu hefur landsliðsþjálfarinn Lars Lagerbäck bæst við þann góða hóp, sem treður upp á ráðstefnunni. Lagerbäck mun mætat á ráðstefnuna í kaffihléi klukkan 14:15 og greina frá byrjunarliði og leikskipulagi íslenska karlalandsliðsins.