Landaður afli hjá Faxaflóahöfnum hefur aukist um 7%

Um 7% aukning var á heildarafla sem landað er hjá Faxaflóahöfnum á fyrstu átta mánuðum ársins miðað við sama tímabil í fyrra. Þar vegur þyngst góð loðnuveiði að því er segir á vefsíðu hafnanna.

Landaður bolfiskur er nánast sá sami og var fyrstu 8 mánuðina í fyrra, bæði á Akranesi og í Reykjavík, en helsta breytingin á þeim fisktegunum er samdráttur í löndun á úthafskarfa, en nokkur aukning í löndun á Barentshafsþorski.

Heildarafli, sem landað hefur verið hjá Faxaflóahöfnum er tæp 114 þúsund tonn, en var á sama tíma í fyrra liðlega 106 þúsund tonn. Breytingin felst fyrst og fremt í að á Akranesi var heildarafli fyrir ári síðan 33.828 tonn en er nú liðlega 46.000 tonn. Þar af er loðna 44.050 tonn og bolfiskur 858 tonn.