Hagvöxtur var 2,4% á fyrri helming ársins

Landsframleiðslan á fyrstu sex mánuðum ársins jókst um 2,4% að raungildi borið saman við fyrstu sex mánuði ársins í fyrra.

Þetta kemur fram á vefsíðu Hagstofunnar. Þar segir að á sama tíma jukust þjóðarútgjöld um 4,2%. Einkaneysla jókst um 4% og fjárfesting um 19,3%. Samneysla dróst hins vegar saman um 0,7%. Útflutningur jókst um 4,9% og innflutningur nokkuð meira, eða um 8,8%.

Landsframleiðsla á 2. ársfjórðungi ársins, án árstíðaleiðréttingar, jókst um 0,5% frá sama ársfjórðungi í fyrra en árstíðaleiðrétt landsframleiðsla dróst saman um 6,5% frá 1. ársfjórðungi í ár.