Óskar eftir sérstökum fundi í viðskiptanefnd vegna úrræða tollstjóra

Guðlaugur Þór Þórðarson, þingmaður Sjálfstæðisflokksins, hefur óskað eftir sérstökum fundi í efnahags- og viðskiptanefnd Alþingis til að fá frekari skýringar úrræðum sem tollstjóraembættið hefur boðið fyrirtækjum sem skulda skatta, en embættið hefur gert samninga um greiðsluáætlun við fjölda fyrirtækja vegna skattskulda.

Embætti tollstjóra hefur frá árinu 2009 gert samkomulag við hundruð fyrirtækja sem skulda opinber gjöld og eru dæmi um fyrirtæki sem skulda marga tugi milljóna króna í vörsluskatta en hafa ekki þurft að þola stöðvun atvinnurekstrar, eins og við greindum frá í fréttum okkar í gær.

Tollstjóri hefur ekki beitt stöðvun á nein fyrirtæki frá árinu 2009 vegna tilmæla frá fjármálaráðuneytinu um að beita ekki hörðustu aðgerðum.

Guðlaugur Þór Þórðarson, þingmaður, segir brýnt í þágu gagnsæis í stjórnsýslunni að það liggi fyrir upplýsingar hvort þessi tilmæli hafi verið nægilega vel kynnt fyrir forsvarsmönnum fyrirtækja. Hann hefur óskað eftir fundi í efnahags- og viðskiptanefnd Alþingis og vill að tollstjóri verði boðaður á fund nefndarinnar til að fara yfir málið.

„Mér þykir þetta áhugavert út frá mörgum hliðum. Í fyrsta lagi, hvernig hefur þetta verið kynnt og standa allir jafnfætis? Þær upplýsingar sem ég hef þá hefur hið opinbera, eða tollstjóri, ekki verið að gefa neitt eftir í innheimtu og nýtt fjárnámsgerðir. Ég tel að það sé mjög mikilvægt að það liggi fyrir hvaða tilmæli þetta eru, hvernig þau voru kynnt og hvort þessi úrræði hafi staðið öllum til boða," segir Guðlaugur Þór. thorbjorn@stod2.is