Aflaverðmætið jókst um 15,7% í fyrra

Aflaverðmæti íslenskra skipa jókst um 15,7% í fyrra miðað við árið á undan. Þetta kemur fram í ritinu „Afli, aflaverðmæti og ráðstöfun afla 2011" sem Hagstofan hefur gefið út.

Á vefsíðu Hagstofunnar segir að í ritinu komi m.a. fram að árið 2011 var afli íslenskra skipa tæp 1.149 þúsund tonn, 85 þúsund tonnum meiri en árið 2010. Aflaverðmæti nam tæpum 154 milljörðum króna og jókst um 15,7% frá fyrra ári, eða um 3,2% ef mælt er á föstu verði.

Stærsti hluti afla íslenskra fiskiskipa var unninn á Austurlandi, mest uppsjávarafli sem landað var þar. Stærsti hluti botnfiskaflans var unninn á höfuðborgarsvæðinu og á Suðurnesjum eða 46%. Af þorskaflanum fór mest í landfrystingu og makrílaflinn fór að langstærstum hluta annað hvort í landfrystingu eða var sjófrystur.

Verðmæti aukaafurða sem féllu til við vinnslu fiskaflans nam 3,7 milljörðum króna á árinu 2011 og jókst um 15,8% frá árinu áður. Verðmæti aukaafurða telst ekki með í heildaraflaverðmæti.