Auglýsingastofan Brandenburg ræður tvo nýja hönnuði

Auglýsingastofan Brandenburg hefur ráðið tvo nýja hönnuði til starfa á þessa nýju og ört vaxandi stofu í miðborginni.

Þetta eru þeir Hörður Lárusson, grafískur hönnuður og formaður FÍT (Félag íslenskra teiknara) og Árni Þór Árnason, hönnuður og myndlistamaður. Báðir eru þeir með mikla reynslu úr hönnunar- og auglýsingabransanum, eftir því sem fram kemur í tilkynningu frá Brandenburg. Ásamt því að starfa um árabil á Vinnustofu Atla Hilmarssonar, kennir Hörður við LHÍ og situr nú í stjórn ADC*E (Art Directors Club of Europe). Árni Þór hefur komið víða við á veiðilendum auglýsingalandsins og starfaði áður hjá Góðu Fólki, Fastlandi og Fíton.

Brandenburg hefur þar með lokið leikmannakaupum fyrir haustið, eins og segir í tilkynningu frá fyrirtækinu. Á meðal viðskiptavina stofunnar eru WOW air, Nýherji, Þjóðleikhúsið, MP banki og Kjörís.