Veiðigjöld 6 prósent af rekstrarhagnaði

Veiðigjöld HB Granda, næst stærsta útgerðarfyrirtæki Íslands á eftir Samherja, námu um 1,8 milljónir milljónum evra á fyrri helmingi ársins, eða sem nemur ríflega 270 milljónum króna. Þetta nemur um sex prósentum af rekstrarhagnaði fyrir fjármagnsliði og afskriftir (EBITDA-hagnaði), en hann nam 28,7 milljónum evra, eða sem nemur 4,4 milljörðum króna. Það er besta rekstrarafkoma í sögu fyrirtækisins, á tveimur ársfjórðungum.

Tap tímabilsins, samkvæmt uppgjöri, nemur hins vegar 1,5 milljónum evra, það er tæplega 230 milljónum króna.Tapið skýrist einkum af gjaldfærslu vegna virðisrýrnunar aflaheimilda upp á 21,6 milljónir evra, eða um 3,4 milljarða króna. Fyrirtækið greiddi síðan niður vaxtaberandi skuldir um 23,9 milljónir evra eða 3,6 milljarða króna. Árið áður var hagnaður 15,7 milljónir evra, eða 2,4 milljarða króna, á sama tímabili, eftir því sem fram kemur í tilkynningu félagsins til Kauphallarinnar.

Í tilkynningunni er bent á að Alþingi samþykkti í lok júní síðastliðnum ný lög um veiðigjöld sem fela í sér að veiðigjöld HB Granda hf. rúmlega fjórfaldast frá síðasta fiskveiðiári. Miðað við forsendur laganna nema áætluð veiðigjöld til greiðslu vegna fiskveiðiársins 2012/2013 tveimur milljörðum króna. Eftir það er gert ráð fyrir stighækkandi sérstöku veiðigjaldi þar til veiðigjöldin á fiskveiðiárinu 2016/2017 ná 65% af sérstaklega reiknaðri rentu allra sjávarútvegsfyrirtækja samanlagt byggt á almanaksárinu 2014. Segir að veruleg hækkun á veiðigjöldum félagsins lækki rekstrarvirði þess.

Sjá má tilkynningu HB Granda hér.