Hvítá/Ölfusá: 206.707 laxar í net frá 1974

Árni Baldursson, hjá Lax-á, birtir harðorðan pistil á heimasíðu félagsins í dag þar sem hann gagnrýnir netaveiði í Hvítá og Ölfusá. Árni bendir á að netaveiðibændur hafi tekið þrjá fjórðu af öllum veiddum frá árinu 1974 til 2011. Á bak við þau hlutföll eru 206.707 laxar veiddir í net; 71.373 á stöng.

Árni gerir það að umtalsefni hver sanngirnin sé í því að 20 netabændur séu svo stórtækir í veiðum á vatnasvæðinu sem raun ber vitni þar sem laxinn sé augljóslega á leiðinni í árnar þar sem hann er upprunninn þegar hann gengur í netin neðar í vatnakerfinu.

Fjölmargar spurningar setur Árni fram: „Af hverju eru þessar netaveiðar kvótalausar, hvar er nýtingaáætlun Veiðifélags Árnesinga sem öllum veiðifélögum er skylt gera? Af hverju er ekki nýtingaráætlun og kvóti á laxi settur á hverja netaveiðijörð? Af hverju er ekki farið að tilmælum Veiðimálastofnunar?" Eins spyr hann hvernig það megi vera að „örfáar netaveiðijarðir getið tekið til sín í sjálftöku á 75% af heildarveiðinni á laxi á svæðinu" meðan stangveiðimenn reyna af fremsta megni að hlúa að síðustu löxunum.

Pistil Árna má lesa í heild sinni hér en niðurlag greinarinnar er eftirfarandi: „Það þýðir bara ekki að tala um hefðir og hefðir endalaust, netaveiðimenn skulda landeigendum í uppám Árnessýslu margafalda afsökunarbeiðni á því hvernig þeir hafa gengið um auðlindina um áratuga skeið."

Veiðivísir hefur að undanförnu fjallað nokkuð um netaveiði í Hvítá/Ölfusá, en þau skrif má kynna sér hér.

svavar@frettabladid.is