Gengi krónunnar þarf að veikjast

Greiningardeild Arion banka telur að gengi krónunnar þurfi að veikjast áfram svo hægt sé að skapa nægan gjaldeyri til að greiða af erlendum lánum í framtíðinni. Þróun í vöru- og þjónustujöfnuði að undanförnu rennir stoðum undir þessar vangaveltur.

Nýbirtar tölur um vöru- og þjónustuviðskipti gefa til kynna að afgangur á undangengnum árum fari nú minnkandi. Á fyrsta helmingi þessa árs nam afgangurinn einungis 40 milljörðum króna eða 4,5% af landsframleiðslu miðað við ríflega 8% ári fyrr.

Ástæðan fyrir því að lágt gengi krónunnar hefur jákvæð áhrif á vöru- og þjónustuskiptin er sú að þegar gengið helst lágt er eðlilega minna af vörum og þjónustu flutt inn til landsins. Á sama tíma skila útflutningsafurðir landsins fleiri krónum í kassann. Þannig skapast meiri gjaldeyrisforði þegar gengið er lágt og það gerir landinu kleift að borga af erlendum lánum.