Búast við að staða heimilanna batni

ASÍ gerir ráð fyrir að hagvöxtur á nýliðnu ári hafi verið 3,1% eða nokkuð meiri en búist var við. Hann megi reki til aukningar í einkaneyslu og útfutningi. Almennt er gert ráð fyrir hægfara bata með um 1,4-2% hagvexti næstu þrjú ár. Þetta kemur fram í endurskoðaðri hagspá ASÍ til ársins 2014.

ASÍ gerir ráð fyrir að staðan á vinnumarkaði verðo áfram erfið en batni hægt í takt við jákvæðari horfur í efnahagsmálum. Í lok spátímans 2014 er gert ráð fyrir að atvinnuleysið verði 4,9%.

Þá gerir ASÍ ráð fyrir að ráðstöfunartekjur muni hækka vegna launahækkana og tímabundinna aðgerða til stuðnings skuldugum heimilum og staða heimilanna muni því vænkast á næstu misserum. Þegar líður á spátímann og tímabundnum aðgerðum sleppir muni mikil skuldsetning heimilanna og erfitt aðgengi þeirra að lánsfé hefta vöxt ráðstöfunartekna og takmarka getu þeirra til aukinnar neyslu.

Gert er ráð fyrir að gengi krónunnar styrkist um 5% á spátímanum en verði áfram veikt og gengisvísitalan verði komin í 206 stig árið 2014. Þá er gert ráð fyrir að verðbólga verði mikil í ár eða 5,1% en hún minnki smá saman þegar líður á spátímann og verði 2% í árslok 2014.