Samruni Vinnslustöðvarinnar og Ufsabergs stendur

Héraðsdómur Suðurlands hafnaði fyrir helgi kröfum sem Guðmundur Kristjánsson útgerðarmaður, og fulltrúar Stillu útgerðar og KG fiskverkunar, sem mynda minnihluta í hluthafahópi Vinnslustöðvarinnar gerðu um að ákvörðun hluthafafundar fyrirtækisins um samruna Ufsabergs-útgerðar ehf. við Vinnslustöðina yrði ógilt.

Ákvörðunin var tekin þann 21. september í fyrra en samkvæmt ákvörðun hluthafafundarins átti Vinnslustöðin að greiða fyrir samrunann með afhendingu eigin bréfa að andvirði 237.611 evra og afhendingu á ný útgefnu hlutafé að nafnverði 299.057 evra. Heildarhlutafé Vinnslustöðvarinnar hf. eftir hlutafjáraukninguna nam samkvæmt ákvörðun hluthafafundarins 17.459.145 evrum.

Stefnendur byggðu málflutning sinn meðal annars á því að gallar séu í samrunagögnum, sem skuli leiða til þess að ákvörðun um hin umdeilda samruna sé ógildanleg. Vinnslustöðin mótmælti þessu aftur á móti og sagði að ef nokkrir gallar væru í gögnunum, væru þeir svo smávægilegir að ekki geti valdið ógildi ákvörðunarinnar. Héraðsdómur tók undir þetta, sem og fjölmörg önnur rök sem forsvarsmenn Vinnslustöðvarinnar héldu fram í málinu.



Hér má lesa dóm Héraðsdóm Suðurlands.