Hvetur leiðtoga til að tryggja forgang fyrir innistæðueigendur

Steingrímur J. Sigfússon, efnahags- og viðskiptaráðherra, hvetur leiðtoga Evrusvæðisins og Bretlands til að fylgja fordæmi íslenskra yfirvalda og tryggja forgang fyrir innistæðueigendur. Þetta muni draga úr áhrifum mögulegs fjármálahruns.

Þetta kemur fram í pistli eftir Steingrím sem birtist á vef Financial Times í dag.

Þar segir Steingrímur meðal annars að sú leið sem farin var hér landi í kjölfar hrunsins — að gera sparifé innistæðueigenda að forgangskröfu með neyðarlögum — hafi sannað gildi sitt og orðið til þess að uppgjör hrunsins gekk jafn vel og raun ber vitni.

Því hvetur hann erlenda stjórnmálamenn til að horfa til Íslands og tryggja sparifé þegna sinna að fullu. Steingrímur bendir á að víða í Evrópu séu innistæður aðeins tryggðar að hluta til.

Skýr skilaboð til þegna og hluthafa séu gefin þegar varnarveggur sé reistur í kringum innistæðurnar að mati Steingríms. Þannig væri hægt að takmarka kostnað við björgunaraðgerðir sem fylgja mögulega bankahruni.

Þá fagnar Steingrímur fyrirhuguðum umbótum breskra stjórnvalda á fjármálakerfi landsins. George Osborne, fjármálaráðherra Bretlands, sagði fyrr í sumar að til stæði að gera innistæður breskra þegna að forgangskröfu í þeim bönkum sem verða gjaldþrota.

Hægt er að nálgast grein Steingríms hér.