Birtir til í byggingariðnaði

Byggingarkostnaður hækkar töluvert minna á síðustu tólf mánuðum en hann hefur gert síðustu misseri. Í lok síðasta árs var hækkunin 11,4% en nú er hún aðeins 3,9%.

Að undanförnu hefur vísitala íbúðaverðs á höfuðborgarsvæðinu hins vegar hækkað um 7,3% og því hækkar fasteignaverð mun hraðar en byggingarkostnaður um þessar mundir.

Verði áframhald á þessari þróun er ljóst að arðsemi í byggingariðnaði eykst og nýbyggingum fer að fjölga, en sú iðngrein hefur verið í miklum dvala frá hruni. Til dæmis var byrjað á 68 byggingum á höfuðborgarsvæðinu á síðasta ári miðað við 419 íbúðir árið 2007.

Þetta kemur fram í Morgunkorni Íslandsbanka.