Meiri hagvöxtur og lægri verðbólga

Peningastefnunefnd Seðlabanka Íslands hefur ákveðið að halda stýrivöxtum óbreyttum. Þá spáir bankinn meiri hagvexti og lægri verðbólgu í nýjum peningamálum sem komu út í dag.

Vextir Seðlabanka Íslands verða því áfram 6,75% af daglánum, 5,75% af lánum gegn veði í sjö daga og 4,75% af innlánum. Ákvörðun peningastefnunefndar er í takt við spár greiningaraðila, sem flestir gerðu ráð fyrir óbreyttum vöxtum.

Í Peningamálum sem komu út í dag kemur fram að hafa verðbólguhorfur hafa batnað vegna hærra gengi krónunnar en krónan hefur styrkst um 8,2 prósent frá útgáfu síðustu Peningamála í maí. Verðbólgan mældist 5,8 prósent á öðrum ársfjórðungi sem er 0,3 prósentum minni en reiknað var með og leiðir lægri verðbólga síðan til meiri hagvaxtar en áður var gert ráð fyrir. Þannig spáir bankinn nú því að hagvöxtur í ár verði rétt yfir 3 prósent eða um hálfu prósenti meiri en í maí.

Í yfirlýsingu peningastefnunefndar kemur hins vegar fram að um verðbólguhorfur ríki sem fyrr óvissa og gæti verðbólga hjaðnað hraðar til dæmis ef gengi krónunnar hækkar frekar eða aukist aftur ef gengið veikist á ný. Þá segir í yfirlýsingunni að eftir því sem slakinn hverfur úr þjóðarbúskapnum er nauðsynlegt að slaki peningastefnunnar hverfi einnig og fer sú framvinda það er hvort stýrivextir munu hækka á næstu misserum eða standa í stað velta á framvindu verðbólgunnar.

„Það geta orðið frávik í báðar áttir. Hagvöxturinn getur orðið meiri eða minni. Minni, þá eru náttúrlega vissar áhyggjur út af alþjóðaástandinu í efnahagsmálum. Það er að byrja að veikja okkar viðskiptakjör. Það getur haft meiri neikvæð áhrif en gert er ráð fyrir í spánni. Og skiptir gengi krónunnar sköpum varðandi verðbólguna og þegar lengra er horft ákvarðanir í launamálum," sagði Már Guðmundsson seðlabankastjóri.