Líklegt að gengislánamál rati til EFTA dómstólsins

Hæstarétttarlögmaður telur líklegt að prófmáli vegna gengislána verði vísað til Efta dómstólsins, sem gæti frestað því um tólf mánuði að botninn verði sleginn í langri sögu þeirra um dómskerfið.

Umboðsmaður skuldara og fleiri hafa að undanförnu verið bjartsýn á að hægt verði að koma ellefu prófmálum um gengislán í gegnum dómskerfið á næstu mánuðum. Prófmálin eiga að svara þeim liðlega 20 álitaefnum sem hafa vaknað við gengisdóma síðustu ára.

En í samantekt fjögurra lögmanna sem völdu þessi ellefu prófmál kemur fram að líklegt sé að fram komi krafa um að leitað verði ráðgefandi álits EFTA dómstólsins.

Þeir lögmenn sem fréttastofa ræddi við í dag, töldu sennilegt að einhverju málanna yrði skotið þangað.

Gæti þetta tafið verulega að botn fáist í þessa löngu sögu gengismála? spyr fréttakona.

„Það myndi vissulega tefja þetta tiltekna mál ef þessu úrræði yrði beitt," segir Einar Hugi Bjarnason, hæstaréttarlögmaður.

Hann telur líklegt að aðeins einu máli verði vísað til Efta dómstólsins - en hversu lengi gæti tafist þá að fá niðurstöðu?

„Ég ímynda mér að töfin sem það myndi valda væri kannski í kring um tólf mánuði eða eitthvað slíkt," segir Einar.

Það myndi þó ekki, að mati Einars Huga, koma í veg fyrir að stóru línurnar skýrist í þessum málum.

„Þessi dómsmál eru 11 talsins. Þó að eitt þeirra færi þessa leið er ekki þar með sagt að það myndi skekkja heildarmyndina," segir hann.