Tommi lætur sig dreyma um fleiri staði

„Maður lætur sig dreyma um að opna fleiri staði, en fyrst verður maður nú að halda utan um þennan og festa rætur," sagði Tommi á Hamborgarabúllunni, sem nýverið opnaði Hamborgarasölustað í London, í viðtali í útvarpsþættinum Reykjavík síðdegis.

Eftir að hamborgararnir fengu glimrandi dóma í blaðinu The London Evening Standard hefur verið hreinlega brjálað að gera. Ásóknin er sögð hafa aukist um 30-40% síðan dómurinn birtist.

„Þetta kom okkur mjög á óvart og gladdi alla mjög mikið," segir Tommi en að hans sögn er umrætt dagblað stórt, dreift í um 700 þúsund eintökum í London og tekið fremur alvarlega.

Borgararnir eru í raun sömu borgarar og seldir eru hér heima að öðru leyti en því að notast er við erlent hráefni.

Hér að ofan má hlusta á viðtalið við Tomma.