Skuldatryggingaálag Íslands lækkar nokkuð

Skuldatryggingaálag á evruskuldir Ríkissjóðs Íslands hefur lækkað nokkuð að undanförnu. Þannig stóð skuldatryggingaálagið í lok dags í gær í 249 punktum (2,49%) samkvæmt gögnum úr Bloomberg-gagnaveitunni en fyrir um viku síðan var það að sveiflast í kringum 280 punkta.

Þetta kemur fram í Morgunkorni greiningar Íslandsbanka. Þar segir að frá áramótum talið hefur álagið að jafnaði verið um 276 punktar og er því álagið nú nokkuð lægra, en miklar sveiflur eru á því frá einum degi til annars.

Af þeim ríkjum Vestur-Evrópu sem seldar eru skuldatryggingar fyrir er skuldatryggingaálagið langhæst á Grikkland, sem er ekkert nýtt af nálinni enda hefur slíkt verið raunin síðustu misserin og er landið vart samanburðarhæft við önnur lönd. Næsthæst er álagið á Portúgal (689 punktar) og í kjölfarið kemur Spánn (490 punktar). Í þessum samanburði er álagið á Ísland hið sjötta hæsta, en álagið á Ítalíu (445 punktar) og Írland (437 punktar) er hærra.

Segja má að horfur á næstu tveimur árum í þessum löndum samræmist nokkuð skuldatryggingaálagi þeirra. Í nýjustu spá Efnahags- og framfarastofnunarinnar OECD sem er frá því í júní sl. horfir einna verst á því tímabili hjá undangreindum evruríkjum. Þannig reiknar stofnunin með mestum samdrætti á þessu ári í Grikklandi (-5,3%) af öllum löndum OECD sem eru 34 talsins, og næstmestum í Portúgal (-3,2%). Þar að auki er reiknað með samdrætti á Ítalíu (-1,7%) og á Spáni (-1,6%).

Í raun eru hagvaxtahorfurnar hér á landi mjög góðar í samanburði við önnur OECD ríki. Stofnunin spáir hagvexti upp á 3,1% hér á landi í ár og 2,7% á næsta ári, en að meðaltali 1,6% hagvexti í ríkjum OECD í ár og 2,2% á næsta ári, að því er segir í Morgunkorninu.