Telur óþarft að banna sveitarfélögum að taka erlend lán

Halldór Halldórsson, formaður Sambands íslenskra sveitarfélaga segir óþarft að banna sveitarfélögum að taka erlend lán, eins og Seðlabankinn leggur til.

Í skýrslu Seðlabankans, sem ber titilinn Varúðarreglur eftir fjármagnshöft, og fjallar um það hvaða regluverk mun taka við þegar gjaldeyrishöftum verður aflétt er mælst til þess að settar verði skorður við lánveitingum í erlendum gjaldmiðlum til sveitarfélaga, heimila og annarra sem ekki hafa tekjur eða eignir í erlendum gjaldmiðli. Þetta megi gera með beinum lagafyrirmælum eða með óbeinum varúðarreglum.

„Ég verð að segja alveg eins og er að ég er ekki hlynntur slíkum boðum og bönnum," segir Halldór Halldórsson, formaður Sambands íslenskra sveitarfélaga. „Sveitarstjórnamenn eru kjörnir af almenningi og þeir eiga að standa og falla með sínum verkum, líka hvort þeir hafi tekið skynsamlegar eða óskynsamlegar ákvarðanir þegar þeir tóku erlend lán," segir Halldór enn fremur.

Halldór tekur þó skýrt fram að hann telji að sveitarfélög eigi að varast erlend lán. „En mér finnst að það eigi að vera mat hvers og eins sveitarfélags en ekki að stjórnvaöld eigi að banna þetta," bætir hann við. Þannig sé þetta á ábyrgð sveitastjórna í hverju sveitarfélagi fyrir sig. „Íbúar bera ábyrgð á sínum sveitarstjórnarmönnum, þeir völdu þá. Og sveitastjórnarmenn bera ábyrgð gagnvart íbúunum," segir Halldór.

Halldór bætir því við að það séu komnar fjármálareglur fyrir sveitarfélgöin sem Samband íslenskra sveitarfélaga hafi kallað stíft eftir. „Ég tel því að við séum komnir með nægjanlega stífan ramma utan um fjármál sveitarfélaga og þetta sé óþarfa viðbót," segir Halldór að lokum.