Már: Nauðsynlegt að innleiða varúðarreglur fljótt og örugglega

Már Guðmundsson seðlabankastjóri segir að varúðarreglur í tengslum við afnám gjaldeyrishafta séu nauðsynlegar til þess að verja efnahag landsins og takmarka áhættu. Hann segir innleiðingu á þeim reglum sem bankinn leggur til þurfi að vera lokið áður en höftum verður aflétt.

„Þessar breytingar flestar hverjar þyrftu að vera komnar til framkvæmda áður en höftin eru endanlega afnumin. Sérstaklega eru það reglur um laust fé og gjaldeyrisjöfnuð bankanna, að einhverju leyti varðandi gjaldeyrislán óvarinna aðila og síðan tímabundnar reglur til þess að tempra erlenda fjárfestingu lífeyrissjóðanna ... Það er mjög mikilvægt að gera þetta núna," segir Már.

Hann segir að varrúðarreglur þær sem seðlabankinn fjallar um vera í takt við þróun erlendis um þessar mundir, þar sem þjóðir heims og seðlabankar leiti leiða við að takmarka áhættu af of miklu innstreymi fjármagns í hagkerfi og of mikilli skuldsetningu.

„Það er mjög mikilvægt að þegar alþjóðlegt regluverk er innleitt hér í framtíðinni, að við gerum sérstaka greiningu á áhættu fyrir Ísland og tökum á henni."