Sérfræðingar reikna með minni verðbólgu

Nokkuð hefur dregið úr verðbólguvæntingum sérfræðinga á íslenska fjármálamarkaðinum. Þeir reikna nú með því að verðbólgan verði 4,6% á þriðja ársfjórðungi ársins og verði 4,8% eftir eitt ár.

Þetta kom fram í reglubundinni könnun Seðlabankans meðal 35 einstaklinga sem vinna á skuldabréfamarkaðinum sem gerð var í ágúst. Í fyrri könnun fyrir þremur mánuðum voru verðbólguspár þessara markaðsmanna um og yfir 5% fyrir þessi tímabil.

Þá kemur fram að þessir markaðsmenn reikna með að gengi evrunnar verði 155 krónur eftir eitt ár sem er 11 krónum lægra en í síðustu könnun.