Skattlagning á áunnin sparnað yrði stjórnarskrárbrot

Hugmyndir um að skattleggja áunninn séreignarsparnað standast engan veginn gagnvart ákvæðum stjórnarskrár Íslands um jafnræði og mannréttindi, friðhelgi eignarréttar og skattamál. Þetta er niðurstaða álitsgerðar sem Einar Gautur Steingrímsson hæstaréttar-lögmaður vann að ósk Landssamtaka lífeyrissjóða vegna hugmynda sem fram hafa komið um að breyta skattlagningu séreignarsparnaðar og skattleggja þegar uppsafnaða inneign en ekki við útgreiðslur.

Í fréttatilkynningu sem Landssamtök lífeyrissjóða sendu frá sér rétt fyrir hádegi segir að samtökin hafi varað við þessum hugmyndum og bent á að þær geti haft mjög skaðleg áhrif á lífeyriskerfið og vilja einstaklinga til að leggja fyrir aukalega til eftirlaunaáranna.

Helstu niðurstöður Einars Gauts eru eftirfarandi:

1. Breytingar á skattareglum sem hér eru til umræðu fást ekki staðist 65. gr. stjórnarskrárinnar þar sem afleiðingarnar bitna ekki með sama hætti á sambærilegum hópum.

2. Að taka upp á ný álagningu skatta á tekjur liðins tíma, og ákveða að skattleggja þær með öðrum hætti en þá var gert ráð fyrir, er í andstöðu við 2. mgr. 77. gr. stjórnarskrárinnar.

3. Að breyta inntaki eignarréttar manna í séreignarsjóði er í andstöðu við 72. gr. stjórnarskrárinnar og koma þar sjónarmið um réttmætar væntingar, réttaröryggi, meðalhóf, jafnræði og hversu sérgreind þessi eignarréttindi eru, öll til sögunnar og bera að sama brunni.