Tekjur ríkissjóðs jukust um 18%

Tekjur ríkissjóðs á fyrri helmingi ársins jukust um 17,6% frá sama tímabili í fyrra og voru um 252 milljarðar króna. Tekjurnar eru nú um 22,2 milljörðum króna, eða um 9,7%, yfir tekjuáætlun fjárlaga.

Í uppgjöri fjármálaráðuneytisins, sem birt hefur verið á Netinu, kemur fram að þótt innheimtan sé vissulega sterk megi að hluta rekja hana til þess að arðgreiðslur innheimtust fyrr en gert hafði verið ráð fyrir. Fjármunatekjur og tekjur sem teljast óreglulegar námu rúmum 10 milljörðum króna á fyrri árshelmingi og ef leiðrétt er fyrir þeim námu heildartekjur ríkissjóðs á tímabilinu 242 milljörðum króna. sem er 11,8 milljörðum yfir áætlun.