Ferðamenn eyða metfé á Íslandi

Velta erlendra greiðslukorta hér á landi í júlí nam 13,1 milljarði króna og hefur aldrei verið meiri í krónum talið. Þetta kemur fram í Morgunkorni Íslandsbanka. Alls nam velta erlendra korta í innlendum verslunum 11 milljörðum króna í júlí, en um tveir milljarðar voru teknir út úr hraðbönkum og bönkum.

Í sama mánuði nam velta íslenskra korta í útlöndum 5,2 milljörðum króna. Það sem af er þessu ári nemur erlend kortavelta hér á landi 43 milljörðum króna en íslenskir ferðamenn hafa á sama tímabili velt 32 milljörðum króna á kort sín í útlöndum.

Þessi þróun er í samræmi við fjölgun erlendra ferðamanna til Islands en þeim hefur fjölgað um 17% á fyrstu sjö mánuðum ársins.