Útboð borana í Bjarnarflagi framlengt

Landsvirkjun hefur framlengt útboð vegna Bjarnarflagsvirkjunar fram í september. Frestur til að skila inn tilboðum í boranir á háhitaholum átti að renna út í dag, 14. ágúst, samkvæmt útboðsauglýsingu fyrr í sumar. Nýr tilboðsfrestur hefur nú verið auglýstur til hádegis 6. september.

„Ákveðið var að framlengja tilboðsfresti í borun við Bjarnarflag að ósk bjóðenda," sagði Magnús Þór Gylfason, starfandi yfirmaður samskiptasviðs Landsvirkjunar, þegar fréttastofa leitaði skýringa á seinkuninni.

Það var í lok júnímánaðar sem Landsvirkjun óskaði eftir tilboðum í borun á allt að þremur háhitaholum á Norðausturlandi. Verkið felst í borun á allt að 2.500 metra djúpum háhitaholum, stefnuboruðum eða beinum sem áætlað er að bora á árunum 2012 til 2013. Samkvæmt auglýsingunni skiptist verkið í tvo verkáfanga. Verkáfangi 1 felur í sér borun á tveimur háhitaholum, annarri beinni og hinni stefnuboraðri, og verkáfangi 2 felur í sér borun á einni beinni háhitaholu til viðbótar. Fyrirvari er gerður í útboðsgögnum um gerð verksamnings um þriðju háhitaholuna.

Landsvirkjun auglýsti fyrr í sumar einnig eftir tilboðum í uppsetningu vinnubúða Landsvirkjunar í Bjarnarflagi og rann tilboðsfrestur út þann 1. ágúst. Sex tilboð bárust og átti Rafeyri ehf. það lægsta, - upp á 27,5 milljónir króna, sem var um 82% af 33,7 milljóna króna kostnaðaráætlun. Vinnubúðirnar eiga að vera tilbúnar þann 15. nóvember.