Landsbankinn greiðir fyrir laxveiði framkvæmdastjóra

Landsbankinn hyggst greiða fyrir laxveiðiveiðiferð Árna Þórs Þorbjörnssonar, framkvæmdastjóra fyrirtækjasviðs bankans, en í byrjun vikunnar fór hann til veiða með erlendum bankamönnum og einstaklingum er tengjast fyrirtækinu Promens, sem framleiðir plastafurðir ýmis konar. Frá þessu er greint í DV í dag, og er þar haft eftir Kristjáni Kristjánssyni, upplýsingafulltrúa bankans, að ferðin hafi verið á vegum Promens, en að hún verði greidd af bankanum.

Kristján segir ennfremur í greininni að búið sé að taka fyrir boðsferðir á vegum bankans, og að almennt sé starfsmönnum ekki heimilt að þiggja boðsferðir, nema að viðskiptahagsmunir séu í húfi. Kristján segir að bankinn hafi metið það svo að viðskiptahagsmunir væru í húfi, þegar kom að veiðinni í Laxá í Kjós.

Landsbankinn á helmingshlut í Promens, á móti Framtakssjóði Íslands. Landsbankinn er stærsti einstaki eigandi Framtakssjóðsins með ríflega 27 prósent hlut.