BHM gerir kröfu um að öll réttindi haldi sér

Bandalag háskólamanna, BHM, sendi frá sér fréttatilkynningu í morgun, þar sem kröfur bandalagsins eru tíundaðar, þegar kemur að lífeyrisréttindum opinberra starfsmanna. Í tilkynningu segir meðal annars að þess sé krafist að staðið verði að fullu við núverandi lífeyrisskuldbindingar gagnvart sjóðfélögum B-deildar LSR og LSS hvort sem þeir hafa hafið töku lífeyris eða ekki.

Í Fréttablaðinu í morgun, og Markaðnum fylgiriti Fréttablaðsins um viðskipti, kemur fram að meðal þess sem sé í athugun, er að hækka lífeyrisaldur úr 65 í 67 ár, og almennt að jafna réttindi þeirra sem greiða í lífeyrissjóði. Í tilkynningu BHM segir enn fremur að mögulegar breytingar á fyrirkomulagi lífeyrismála og þar með launa snerti veruleika framtíðarstarfsfólks hjá ríkinu, enda hefur BHM ekki verið til viðræðu um að breyta þegar áunnum og umsömdum kjörum þeirra sem nú starfa fyrir ríkið.

Í tilkynningu BHM segir:

„BHM krefst þess að fulltrúar fjármálaráðherra í stjórn LSR fari að lögum og samþykki nauðsynlega hækkun iðgjalds launagreiðanda í A-deild sjóðsins, þannig að sjóðurinn standi undir lífeyrisloforðum.

BHM hefur lýst sig reiðubúið til viðræðna um nýskipan lífeyrismála, sé eftirfarandi skilyrðum fullnægt:

· Staðið verði að fullu við núverandi lífeyrisskuldbindingar gagnvart sjóðfélögum B-deildar LSR og LSS hvort sem þeir hafa hafið töku lífeyris eða ekki.

· Tryggt verði að lögbundin réttindi í A deild LSR haldist óbreytt, og að þeir sem eru í sjóðnum nú eigi rétt á að vera þar áfram með óbreyttum kjörum.

· Sá munur sem kann að verða á núverandi kerfi og nýju lífeyriskerfi verði bættur að fullu í launum.

BHM leggst gegn því að uppsöfnuðum vanda LSR verði ýtt yfir á komandi kynslóðir ríkisstarfsmanna. Mögulegar breytingar á fyrirkomulagi lífeyrismála og þar með launa snerta veruleika framtíðarstarfsfólks hjá ríkinu, enda hefur BHM ekki verið til viðræðu um að breyta þegar áunnum og umsömdum kjör þeirra sem nú starfa fyrir ríkið.

Ranghermt er í umfjöllun Fréttablaðsins að samningaviðræður séu á viðkvæmu stigi, enda hefur BHM ekki verið falið umboð til samninga um lífeyrisréttindi, þótt nefnd hafi verið stofnuð til að fjalla um vanda LSR. Nefndin fundaði síðast í maí síðastliðnum og hefur alls átt 4 fundi á því rúma ári sem hún hefur starfað.

Um stöðu mála í samráðsnefnd ríkisins og bandalaga opinberra starfsmanna um málefni LSR er rétt að ítreka afstöðu BHM til stöðu lífeyrismála opinberra starfsmanna.

BHM krefst þess að fulltrúar fjármálaráðherra í stjórn LSR fari að lögum og samþykki nauðsynlega hækkun iðgjalds launagreiðanda í A-deild sjóðsins, þannig að sjóðurinn standi undir lífeyrisloforðum."