Álverð snarlækkar

Álverð hefur farið nokkuð hratt lækkandi undanfarna mánuði og stendur nú í innan við $1900/tonn. Það er um 20% lægra en það var þegar ál var hvað dýrast í byrjun mars, þegar tonnið kostaði 2353 dali og hefur lækkað um 7% frá áramótum, þegar tonnið kostaði 2020 dali.

Ljóst er að þessi verðlækkun hefur slæm áhrif á tekjustreymi Landsvirkjunar. Í Markaðspunktum Arion banka kemur fram að Landsvirkjun tiltekur þrenns konar markaðsáhættu sem steðjar að félaginu. Þar er álverðsáhætta, sem fólgin er í raforkusamningum sem tengdir eru við álverð, vaxtaáhætta vegna lána fyrirtækisins og gjaldmiðlaáhætta vegna hvort tveggja skulda félagsins í erlendri mynt og sjóðstreymis þess, en orkusamningar eru gerðir upp í dollurum.