Aldrei fleiri farþegar hjá Icelandair - 279 þúsund í júlí

Icelandair flutti 279 þúsund farþega í millilandaflugi í júlí og voru þeir 10% fleiri en í júlí á síðasta ári. Aldrei hafa fleiri farþegar ferðast með félaginu í einum mánuði, að því er segir í tilkynningu frá félaginu.

Framboðsaukning  var 11% á milli ára. Sætanýting nam 85,3% samanborin við 85,4% í júlí 2011.  Farþegum fjölgaði mest á N-Atlantshafsmarkaðinum eða um 13% og aukningin á ferðamannamarkaðinum til Íslands nam um 10%.

Farþegar í innanlands- og Grænlandsflugi voru um 38 þúsund í júlí sem er aukning um 1% á milli ára.  Sætanýting nam 69,6% og drógst saman um 3,9 prósentustig á milli ára. Seldum blokktímum í leiguflugi fækkaði um 11% m.v. júlí á síðasta ári, þar sem fraktvélar í leiguflugsverkefnum voru einni færri en í fyrra. Fraktflutningar jukust um 7% á milli ára. Framboð á gistinóttum hjá hótelum félagsins jókst um 7% frá júlí á síðasta ári. Herbergjanýting var 88,0% og var 2,7 prósentustigum hærri en í júlí 2011.