Harpan aðeins lítið brot af heildarmyndinni fyrir hrunið

Svissneska fjárfestingafélagið World Leisure Investment átti hæsta boð í byggingarétt á reitnum við hlið Hörpunnar, og hyggst reisa þar hótelbyggingu sem verður fimm hæða, auka tveggja hæða bílastæðakjallara niður á við. Samkvæmt samþykktu skipulagi má byggingin vera 30 þúsund fermetrar að stærð, en til samanburðar er Harpan 28 þúsund fermetrar.

Eins og fréttastofa hefur greint frá eru samningaviðræður vegna hótelsins nú á lokastigum og er enn stefnt að uppbygging þess hefjist á upphafsmánuðum næsta árs, og verði fullbúið til notkunar 2015. Fjárfestingin verður í heild upp á tæpa átta millljarða, þ.e. 40 milljónir evra í bygginguna sjálfa, eða um sex milljarða króna, og síðan 1,8 milljarða í byggingaréttinn. Meðal þess sem ekki er enn frágengið er að fá rekstraraðila að hótelinu, en nær fullvíst er að það verði rekið undir merkjum Marriot-hótelkeðjunnar.

Hugmyndir um byggingamagn á svæðinu við Hörpuna voru hástemmdar fyrir hrun, en þær hafa ekki verið lagðar alfarið á hilluna. Landsbankinn hefur enn hug á því að byggja höfuðstöðvar sínar í miðborginni, en í umsögn bankans vegna vinnu við atvinnustefnu Reykjavíkurborgar kom fram að bankinn vildi byggja nýjar höfuðstöðvar fyrir árið 2015. Bankinn horfir m.a. til sama reits og horft var til fyrir hrunið.

Á meðfylgjandi mynd, sem birtist með umfjöllun í Húsum og Híbýlum í septembermánuði 2008, sést hvernig útlit svæðisins var hugsað, skömmu áður en fjármálakerfið hrundi.