Íbúðirnar ekki leiguhæfar og því tómar

Forstjóri Íbúðalánasjóðs segir þær fimmtíu eignir sem standi tómar á Árborgarsvæðinu ekki vera í leiguhæfu ástandi. Þess vegna hafi sjóðurinn ekki brugðist við áskorun sveitarfélagsins um að setja íbúðirnar á leigumarkað.

Í fréttum okkar í gær greindum við frá óánægju sveitarstjórnarmanna í Árborg og Grímsnes- og grafningshreppi með að Íbúðalánasjóður neitaði að setja tómar íbúðir á svæðinu, í eigu sjóðsins á leigumarkað. Fólk, sem hafði ætlað að flytja á svæðið, hafi hreinlega þurft frá að hverfa vegna skorts á leiguhúsnæði.

Í samtali við fréttastofu segir Sigurður Erlingsson, forstjóri Íbúðalánasjóðs, sjóðinn eiga um það bil hundrað og þrjátíu eignir á svæðinu. Rúmlega fimmtíu séu nú þegar í útleigu, nítján séu á sölu en fimmtíu og þrjár standi tómar.

„Þetta stafar af því að eignir sem hafa komist í okkar eigu og við leigðum hafa ekki verið í því ástandi að þær teljist hæfar á almennan leigumarkað. Þannig að þegar það losnar um leigusamninga höfum við ekki boðið þessar eignir á ný til leigu. Það þarf að leggja svolítinn pening í þær. Af þessum rúmlega fimmtíu eignum sem standa tómar gerum við ráð fyrir að setja flestar á sölu, m.a. þrjár blokkir sem við setjum í sölu í lok sumars," segir Sigurður.

Hann segir því þær eignir sem standi tómar hreinlega ekki vera í leiguhæfu ástandi.

„Nei, við metum það svo að þær þurfi viðhald og andlitslyftingu til að teljast hæfar á almennan leigumarkað," segir hann.

Hann segir það ekki hafa komið sérstaklega til tals að gera upp íbúðirnar.

„Það hefur ekki gert það. Við höfum sett fókusinn á að selja þær. Það getur hins vegar komið til. Ef salan gengur ekki eftir er það möguleiki sem þarf að skoða frekar."

Hann segir stöðu sjóðsins ekki mega verða ráðandi á leigumarkaði á tilteknum svæðum landsins.

„Það er nú í fyrsta lagi ekki hlutverk sjóðsins að vera leigufélag. Síðan er það líka þannig að Íbúðalánasjóður er einn helsti lánveitandi leigufélaga íbúðahúsnæðis á landinu. Þannig að þá erum við komin í þá óþægilegu stöðu að raska rekstrarstöðu okkar viðskiptavina. Það getur haft bein áhrif á okkar útlán. Fyrir vikið höfum við sett okkur innri reglur um það að vera aldrei í ráðandi stöðu þannig að við truflum ekki starfsemi okkar viðskiptavina á hverju markaðssvæði," segir Sigurður.