Innheimtuleyfi þarf fyrir vörslusviptingar

Þeim aðilum sem stunda vörslusviptingar í tengslum við frum- og milliinnheimtu er nú skylt að sækja um innheimtuleyfi til Fjármálaeftirlitsins.

Fjallað er um málið á vefsíðu eftirlitsins. Þar segir að samkvæmt innheimtulögum er fruminnheimta innheimtuviðvörun og milliinnheimta þær innheimtuaðgerðir sem hefjast eftir að skuldari hefur fengið innheimtuviðvörun og áður en löginnheimta hefst.

Alþingi samþykkti hinn 18. júní síðastliðinn lög um breytingu á innheimtulögum þar sem vörslusviptingum var bætt við skilgreiningu laganna á innheimtu og aðilum sem stunda vörslusviptingar bætt við skilgreiningu laganna á innheimtuaðilum.

Fjármálaeftirlitið hvetur þessa aðila til að sækja um innheimtuleyfi til Fjármáleftirlitsins svo fljótt sem unnt er hyggist þeir á annað borð halda vörslusviptingarstarfsemi sinni áfram.