Kannski rétt að takmarka veiðar á ýsu

Ef dregið hefði verið meira úr ýsuveiðum síðastliðin ár hefði verið hægt að nýta sterka stofna betur. Þetta segir forstjóri Hafrannsóknarstofnunar sem vill skoða hvort rétt sé að takmarka veiðar á ákveðnum svæðum til að vernda stofninn.

Sjávarútvegsráðherra ákvað í gær hver heildaraflinn verður fiskveiðiárið 2012 til 2013. Sjötta árið röð verður dregið úr veiðum á ýsu en aðeins var gefinn út kvóti fyrir 36 þúsund tonn. Þannig er aflamark í ýsu næsta fiskveiðiárið aðeins 40% þess sem það var fiskveiðiarið 2006/07.

Jóhann Sigurjónsson forstjóri Hafrannsóknarstofnunar segir að eftir mjög sterka árganga í kringum aldamótin, sérstaklega árið 2003, þá séu nú fjórir lélegir árgangar að koma inn í ýsuveiðarnar.

„Við lögðum til töluvert vægari sókn. Töluvert vægari sókn þannig að þessir árgangar myndu endast í fleiri ár. Það var okkar tillaga og það var ekki farið fyllilega eftir því. Þannig að við teljum að það hefði mátt gera það skynsamlegra þannig að skellurinn hefði orðið heldur mýkri en það breytir kannski ekki því að við hefðum setið uppi með þessi fjóra lélegu árganga sem við erum núna að sjá núna í farvatinu," segir Jóhann.

Jóhann segir erfitt að segja til um hvað skýringar séu á þessari lélegu nýliðun. Um aldamótin hafi ýsan tekið að færa sig í miklu mæli norður fyrir land samhliða hlýnun í sjónum. Nú sé staðan sú að meirihluti stofnsins sé á norðurmiðum en lugninn af honum lá áður fyrir sunnaland og vestanland.

„Þannig það er náttúrulega stórbreyting á," segir Jóhann.

Hann segir megnið af veiðunum á ýsu nú fara fram við sunnavert landið. Hafrannsóknarstofnun ætli að skoða hvort að rétt sé að takmarka veiðar á því svæði til að vernda stofninn.

„Þannig að þegar tiltekið magn væri komið á land af ýsu sunnan við landið þá yrði sókninni beint norður fyrir land."