Viðskipti hefjast með hlutabréf Regins

Í dag hefjast viðskipti með hlutabréf Regins hf. á Aðalmarkaði NASDAQ OMX Iceland. Reginn, sem er flokkað sem lítið félag innan fjármálageirans er fjórða félagið sem skráð er á Aðalmarkað innan NASDAQ OMX Nordic á árinu og það fyrsta sem skráð er á OMX Iceland á þessu ári.

Reginn hf. er íslenskt fasteignafélag sem fjárfestir í, leigir út og annast rekstur á atvinnuhúsnæði á höfuðborgarsvæðinu. Fasteignasafn Regins telur 30 fasteignir. Heildarfermetrafjöldi fasteignasafnsins er um 153 þúsund fermetrar og yfir 94% leigjanlegra fermetra er í útleigu. Stærstu fasteignir félagsins eru verslunarmiðstöðin Smáralind í Kópavogi og Egilshöll í Grafarvogi.

„Reginn hefur síðan frá hausti 2010 stefnt að skráningu á markað. Þessi áfangi markar hins vegar ekki endi á ferlinu heldur nýtt upphaf í sögu félagsins," segir Helgi S. Gunnarsson, forstjóri Regins. Hann segir að um þúsund hluthafar standi að baki Regin sem sýni mikið traust á eignasafni, rekstri og framtíðarsýn félagsins. „Við teljum mikil sóknarfæri framundan og þetta mun auðvelda félaginu að nýta þau sem best."

"Við bjóðum Regin hjartanlega velkomið í Kauphöllina, en Reginn er fyrsta fasteignafélagið sem skráð er á markað hér á landi," segir Páll Harðarson, forstjóri NASDAQ OMX Iceland. „Félagið er góð viðbót við hinn vaxandi hlutabréfamarkað og eykur fjölbreytni fjárfestingakosta. Reginn hefur nú nýjan áfanga sem skráð félag þar sem það mun njóta aukins sýnileika og aðgangs að nýjum hópi fjárfesta. Við óskum félaginu góðs gengis."

Landsbankinn er umsjónaraðili með skráningunni en Landsbankinn ásamt Íslandsbanka eru viðskiptavakar.